e-zani

Komuniteti Musliman ka lëshuar një sërë akuzash e kërcënimesh në adresë të Imamit të Xhamisë së Medresesë Lulëzim Plloçi. Nëpërmjet një letre zyrtare Selim Muça e akuzon imamin se po pengon zbatimin e vendimit të KMSH-së dhe emërimin e imamit të ri, duke mbajtur me forcë pozicionin e tij. Gjithashtu, në letër imami akuzohet si nxitës i konflikteve në xhaminë e tij, duke iu referuar tensioneve të datës 27 shkurt, kur Muça dhe drejtuesit gylenist të Medresesë, u paraqitën në xhami për të komunikuar shkarkimin e imamit. Ndaj kësaj ngjarjeje, Muça ka kërcënuar se, nëse do të vijohet të pengohet ky vendim, do të kërkojë ndjekje penale në Prokurori për Imamin.

Letra e paraqet situatën sikur bëhet fjalë për “disa persona”, të shtyrë prej imamit për të krijuar konflikte dhe jo si mosaprovim të përbashkët e të njëzëshëm të besimtarëve ndaj shkarkimin e imamit të tyre. Ky skenar, përpiqet t’a izolojë problemin në sa më pak njerëz, në mënyrë që përgjegjësia të mos shpërndahet në shumë supe, gjë që do të bëjë të mundur që presioni dhe kërcënimi të ndjehen më shumë.

 

Xhamia: KMSH shpif ndaj Imamit

 

Nga ana tjetër, Këshilli i Xhamisë me konsensusin e të gjithë besimtarëve, i është përgjigjur akuzave nëpërmjet një letre të dërguar gjithashtu edhe instancave më të larta shtetërore. Ata i konsiderojnë shpifje të rënda akuzat e mësipërme, gjë që vjen në kundërshtim edhe me nenin 120 të Kodit Penal. Shpifje të tilla, sipas tyre, cënojnë rëndë nderin dhe dinjitetin e Imamit të tyre, si dhe parimet e bashkëjetesës dhe harmonisë fetare.

Ata bëjnë të ditur fillimisht se, imami i tyre nuk ka kurrfarë roli në tensionet e krijuara midis tye dhe KMSH-së dhe se janë ata që nuk e kanë pranuar vendimin për shkarkimin e imamit. Për këtë arsye, akuzat se Imami po mban postin me forcë, janë të pabaza, ndërkohë që ata e konsiderojnë reagimin e tyre të ligjshëm e për më tepër, të motivuar në statut. Ata pohojnë kështu njëzëri se konflikti i KMSH-së nuk është me imamin e xhamisë, por me besimtarët e saj.

Gjithashtu, letra bën të ditur se ngjarja ka ndodhur si pasojë e sjelljes së pahijshme të funksionarëve të komunitetit, e cila ka cënuar dinjitetin dhe të drejtat e tyre. Kjo sjellje është konsideruar në shkelje të rëndë edhe ndaj Statutit të këtij institucioni, sipas të cilit, në nenin 2 thuhet: Komunitetit Musliman i Shqipërisë ka si objekt të përhapë, zgjojë dhe forcojë tek besimtarët muslimanë besimin Islam, të mbrojë dinjitetin, të drejtat dhe interesat e muslimanëve (etj..)”. Sipas tyre, me këtë vendim KMSH i ka shkelur të drejtat dhe interesat e muslimanëve.

Përfaqësuesit e xhamisë shprehen se imamët janë njerëz të cilët duhet të gëzojnë një status të veçantë, për shkak të detyrës që kryejnë dhe nuk mund të lëvizen sipas dëshirave dhe tekave të subjekteve të ndryshme që shtrijnë ndikimet e tyre në KMSH. Sipas tyre, vendime të tilla nuk mund të ndërmerren pa marrë pëlqimin e besimtarëve dhe pa dëgjuar zërin e tyre, për vetë faktin që ky institucion parimisht përfaqëson këtë zë. Në këtë mënyrë ai bie ndesh me njerëzit që përfaqëson, gjë që e bën vendimin të pavlerë. Për më tepër, sipas tyre, vendimi bëhet i pavlerë kur ai nuk mbështetet zyrtarisht në asnjë motiv dhe asnjë referencë ligjore.

Muça: Nuk di gjë për kërkesat e besimtarëve

Këshilli i Xhamisë së Medresesë e ka konsideruar vendimin për shkarkimin e imamit të tyre, të motivuar nga interesa të subjekteve ndikuese, të cilat kushtëzojnë veprimtarinë e KMSH-së. Për këtë arsye, ata i kërkojnë Selim Muçës, të marrë situatën në kontroll dhe të pengojë veprimet arbitrare që ndërmerren nga një pjesë e kryesisë. Nëpërmjet kësaj letre, Muçës i bëhet e ditur se, shumë prej veprimeve të ndërmarra nga vartësit e tij, janë bërë pa e vënë atë në dijeni. Kjo vjen, pasi, ata shprehen se vetë Muça u ka thënë se nuk ka qenë në dijeni për shumë prej kërkesave të tyre, të cilat Këshilli i Xhamisë ua ka paraqitur zyrtarëve të lartë të këtij institucioni. Për këtë arsye ata venë në dijeni Muçën për, një takim të bërë me Nënkryetarin Gazmend Aga, për një kërkesë për anullim vendimi të dërguar prej tyre në KMSH, si dhe për takim tjetër të zhvilluar ndërmjet përfaqësuesve të xhamisë dhe Gazmend Agës, Ali Zaimit dhe Ylli Gurrës, të cilat janë bërë pa informuar aspak Kryetarin e Komunitetit Musliman. Kjo treon, ose që Muçës po i fshihet realiteti mbi këto ngjarje, ose se ai nuk ka më kurrfarë peshe në vendimarrjen e institucionit që presupozohet se drejton.

Gjithsesi, Xhamia e Medresesë duket e vendosur të mos lejojë ndërrimin e imamit në asnjë mënyrë. Ata kanë nënshkruar së bashku edhe një peticion të nënshkruar nga besimtarë edhe nga xhamitë e tjera, ku kërkojnë tërheqjen e vendimit dhe mospërsëritjen e veprimeve të tilla. Sido që të jetë, duket se kjo situatë ka sjellë një çarje të madhe midis besimtarëve dhe Komunitetit Musliman, i cili prej kohesh nuk përfaqëson më besimtarët e xhamive.