E-zani

Komuniteti Musliman ka shkarkuar dje Zëvendësmyftiun e Tiranës Nasuf Hoxha. Shkarkimi erdhi krejt papritur, pa asnjë arsye të justifikueshme ligjore, gjë që duket se po përshkallëzon konfliktualitetin në të cilin ky institucion është futur tashmë në mënyrë të verbër. Z. Hoxha njihet si një kontribues i rëndësishëm në Shoqatën Ardhmëria, drejtuesi i së cilës është shkarkuar ditë më parë nga pozicioni i predikuesit në Xhaminë e Medresesë, gjë që e bën mjaft të qartë arsyen e këtij shkarkimi. Sipas KMSH-së vendimi është motivuar me faktin se z. Hoxha është gjithashtu i punësuar në Medresenë e Durrësit dhe se nuk mund të ketë dy pozicione njëherësh. Ky sebep duket qesharak, për më tepër kur z. Hoxha nuk ka qenë i punësuar me bordero të rregullt në postin e Ndihmësmyftiut. Nga ana tjetër, nuk dimë nëse ka apo jo ndonjë mbështetje ligjore për këtë, por sido që të jetë, kjo është një praktikë që ndodh rëndom në KMSH. Për më tepër, nëse është antiligjore, pyetja shtrohet se përse kjo gjë është lënë deri më tani dhe nuk është zbatuar që në fillim dhe nga ana tjetër, përse nuk i është kërkuar të zgjedhë se cilin prej pozicioneve do të duhet të mbajë?

Armiqësia e shpallur nga KMSH, ndaj shoqatës Ardhmëria, në mënyrë të qartë tregon rivalitetin që krerët e lëvizjes Gylen në Shqipëri ndjejnë prej aktivitetit të kësaj shoqate, si një prej stacioneve të rëndësishme të ekspansionit të tyre në truallin xhemator shqiptar. Nuk mund të shpjegohet ndryshe ky fakt kur dimë se kemi të bëjmë me një shoqatë që nuk nuk është shprehur kurre kundër vendimeve të KMSH-së, e cila ka pasur historikisht marrëdhënie korrekte me këtë institucion. Mbi të gjitha, shkarkimi i Zëvendësmyftiut, vjen kur shoqata Ardhmëria ka pranuar vendimin e KMSH-së për shkarkimin e kryetarit të saj z. Piku, nga vaiz i Xhamisë së Medresesë, duke u tërhequr rezistenca e besimtarëve të kësaj xhamie ndaj padrejtësisë së vendimit. Pra, goditja vazhdon, edhe pasi Shoqata Ardhmëria, ka pranuar verdiktin e KMSH-së.

Ekstremizimi i arbitraritetit që Komuniteti Musliman po ushtron ndaj besimtarëve, po i fut marrëdhëniet e këtij institucioni në një qerthull të rrezikshëm armiqësie, gjë që rëndon shumë klimën fetare në vend. Pak ditë më parë, imami i ri i emëruar për Xhaminë e Medresesë, ka denoncuar në Prokurori dy nga besimtarët e xhamisë, për shkak se së bashku me të gjithë të tjerët, e kanë penguar atë të marrë drejtimin e faljes. Denoncimi pretendon se është ushtruar forcë gjatë pengimit të tij, ndërkohë që një prej të denoncuarve është një burrë i moshuar. Nëse imami i ri mendon se do të mund t’a ushtrojë detyrën duke e filluar me denoncime në Prokurori ndaj besimtarëve të vet, ky është një lajm i keq jo vetëm për këta besimtarë, jo vetëm për të gjithë besimtarët muslimanë në Shqipëri, por për klimën e lirisë fetare në vend. Eshtë jashtë çdo lloj logjike normale, që një grup besimtarësh, të cilët mblidhen në mënyrë vullnetare në një objekt kulti, të detyrohen me forcë që praktikat fetare t’i ushtrojnë nën drejtimin e njerëzve që nuk i duan. Kjo do të thotë se klima që po mbillet tashmë në KMSH, është një klimë diktati dhe arrogance, e cila në fakt, nuk mund të dëmtojë tjetër vetëm se vetë atë që e ushtron.