e-zani.

 

Kur postuam tek E-Zani i Naltë reagimin tonë ndaj deklaratës së një farë Forumi Rinor Mysliman, deklaratë e cila, ashtu si kuriozitete të habitshme tërhoqi ca vëmendje mediatike, reagimi ynë u raportua në faqen ResPublica.com dhe gazeta shqiptare në New York, Illyria, i kushtoi deklaratës së Forumit një editorial nga kryeredaktori i gazetës, Ruben Avxhiu, editorial që u pasua me një reagim nga një bashkpuntor i faqes tonë dhe funksionar në bashkësinë myslimane shqiptare në New Jersey, Armir Taraj.

 

Qëndrimi jonë ndaj deklaratës në fjalë është bërë i qartë, por ka gjëra që duhen thënë për këtë vëmendje e shqetësim mediatik për retorikën esktremiste të një forumi gati anonim në Kosovë. Pyetja që ngrëmë është nëse media shqiptare i kushton të njëjtën vëmendje formave të tjera të ekstremizmit, nga bashkësi të tjera fetare apo proponentë të retorikës islamofobe.

 

Kemi vënë në dukje më parë këtu tek EZN se tek faqja ResPublica janë promovuar – jo njerëz gati anonim – por politikanë prominentë që haptazi shpallin qëndrime neo-kryqtare me konotacione të qarta raciste. Administratori i faqes ResPublica, z. M. Nano, një nga gazetarët më të njohur shqiptarë, si intevistues i neo-kryqtarëve si znj. Ledi Shamku apo Mark Marku, nuk e pa të arsyeshme të sfidonte këto qëndrime haptazi ekstremiste e raciste. Në të njëjtën kohë, si intervistues i një funkstionari shtetror të kulturës si z. Aurel Plasari, nuk sheh arsye të zhbirojë me pyetje apo qoftë të komentojë kur promovon në faqen e vetë intervista që quajnë shqiptarët “tradhtarë të Jezu Krishtit” dhe që bëjnë thirrje për një situatë “ideale, një komb, një gjuhë, një fe.” Kujtojmë që në kohën kur znj. Shamku dhe z. Marku deklaronin në faqet e ResPublica dhe Mapo vizionet e tyre neo-kryqtare për kryqzatë në “mborjtje të Kostandinopojës,” një predikues mysliman dergjej në burg se kish folur për “xhihad në Andaluzi,” Spanjën e kohës mesjetare.

 

Ne bashkohemi me shqetësimin e shprehur nga z. Avxhiu në faqet e Illyria, por na duhet të pyesim kur ka dënuar kjo gazetë retorikën ekstremiste anti-myslimane. Jo vetëm, por duhet kujtuar gazeta Illyria që për vite promovon keqinformimet dhe mashtrimet kundra myslimanëve shqiptarë në penën e një sharlatani si Stephen Schwartz.

 

Këto ditë kemi vënë në dukje se në gazeta mainstream si Gazeta Shqiptare dhe Mapo promovohet e citohet Kastriot Myftaraj si studiues. Shumëkund, dikush që quan Breivik hero, që ka kontribuar artikuj në blogun ku Breivik karikohej ideologjikisht, do mbahej larg se do prishte biografinë. Por jo në Shqipëri. Zotërinjtë P. Zogaj dhe K. Blushi e promovojnë këtë tellall të dhunës si studiues dhe e citojnë në artikujtë e tyre.

 

Ne e dënuam retorikën e Forumit të të Rinjve Myslimanë sepse besojmë në nevojën e dënimit të të gjitha formave të retorikës së urrejtjes. Pyetja jonë është kur do fillojë shtypi shqiptar të mbajë qëndrim ndaj ekstremizmit anti-mysliman?