E-zani

Ka përfunduar këto ditë konflikti që vijon prej disa muajsh ndërmjet Komunitetit Musliman dhe besimtarëve të Xhamisë së Medresesë. Palët i kanë dhënë fund situatës së tensionuar, nëpërmjet një marrëveshje të nënshkruar ndërmjet Komunitetit dhe Shoqatës Ardhmëria. , e cila detyron KMSH-në t’i japë leje kësaj shoqate për të ndërtuar një xhami tjetër pranë kësaj zone. Marrëveshja është kërkuar nga krerët e KMSH-së të cilët, siç duket, kanë kuptuar që gjithçka e bërë deri më tani ka qenë një gabim që i ka kushtuar jo pak imazhit të saj tek besimtarët, si dhe në një plan më të gjerë në opinionin publik. Ata i kanë kërkuar “paqe” Ardhmërisë, duke u tërhequr nga pozicionet konfliktuale të deritanishme e duke i premtuar asaj jo vetëm plotësimin e kërkesës për ndërtimin e xhamisë në një hapësirë tjetër (siç është kërkuar që në fillim prej saj), por edhe tërheqjen publike prej akuzave të bëra ndaj saj, ku Ardhmëria është cilësuar si një shoqatë radikale ekstremiste, e financuar me fonde të dyshmita nga Arabia Saudite. Komuniteti Musliman, është tërhequr tashmë nga deklarata të tilla, duke shkuar në qendrime të kundërta, ku i njeh Ardhmërisë të drejtën të ushtrojë veprimtari fetare. Mesa duket drejtuesit gylenist të KMSH-së kanë filluar të kuptojnë se rruga e përplasjes, e ndjekur deri më tani prej tyre në raport me besimtarët e Xhamisë së Medresesë, më së shumti ka dëmtuar ata, dhe ky është një lajm i mirë për të gjithë muslimanët vendas, të cilët i kanë ndjekur me shqetësim ngjarjet e zhvilluara në këtë xhami. Vlen të shihet nëse do të vijohet në këtë mënyrë edhe në sfera të tjera të jetës xhematore, në një kohë kur pjesa më e madhe e besimtarëve, tashmë i sheh raportet me këtë institucion si problematike.

Imami i ri lejohet të drejtojë faljet

Lidhja e kësaj marrëveshje ka çuar në lejimin e imamit të ri të emëruar nga KMSH-ja për të drejtuar faljet në Xhaminë e Medresesë. Imami i ri ka mundur të falë namazin e parë në këtë xhami ditën e djeshme, kur besimtarët nuk kanë reaguar për largimin e tij, ndërkohë që Imam Plloçi, do të rikthehet në një pozicion tjetër, deri në hapjen e xhamisë së re.

Situata mbetet jopak paradoksale. Deri përpara tre-katër ditësh, drejtuesit gylenistë të KMSh-së, përkatësisht Kryemyftiu i ri Ylli Gurra dhe Ali Zajmi, kanë vijuar të provokojnë besimtarët, duke ushtruar presion në mëmyrë që ata të lejojnë imamin e ri të drejtojë faljet. Gjithçka është tashmë paradoksale, për sa kohë që kushtet e pranuara tani prej KMSH-së, janë kërkuar që në fillim prej Shoqatës Ardhmëria dhe përfaqësive të besimtarëve si një alternativë zgjidhjeje, të cilën KMSh-ja e ka refuzuar me arrogancë. Imamit të ri, i duhet tashmë të drejtojë një grup besimtarësh të cilët i ka akuzuar dhe denoncuar në prokurori, dhe të cilët e kanë nxjerrë disa herë jashtë xhamie me forcë. Imami i ri e ka nisur tashmë me këmbën e majtë këtë detyre duke e humbur që në fillim edhe autoritetin edhe besueshmërinë për kryerjen e një detyre të shenjtë si kjo.

Marrëveshja ofron leje për xhami ndaj Ardhmërisë

Marrëveshja e nënshkruar ndërmjet Ardhmërisë dhe KMSH-së, parashikon një sërë detyrimesh midis palëve. KMSH-ja do të japë leje për ndërtimin e një xhamie dhe një qendre kulturore në zonën e Medresesë. Shoqata Ardhmëria do të ushtrojë aktivitetin e saj në këtë qendër, ndërsa KMSH-ja do të miratojë aktivitetin dhe stafin e saj në këtë veprimtari. Gjithashtu, marrëveshja angazhon palët të njohin dhe pranojnë njëra-tjetrën, duke rritur bashkëpunimin, në funksion të një klime më të mirë marrëdhëniesh midis tyre. E gjithë kjo është një tërheqje e plotë e KMSh-së, e cila do të marrë në këmbim mundësinë për të menaxhuar Xhaminë e Medresesë në funksion të praktikave mësimore. Duket krejt naive që gjithçka të jetë bërë thjesht në funksion të këtyre praktikave dhe se shumë qartë kuptohet që qëllimi i drejtuesve gylenistë në gjithë këtë zhurmnajë, ka qenë mbyllja e xhamisë për publikun, duke i ndërprerë mundësitë e kontakteve të medresistëve me besimtarët e xhamisë. Kjo vërtetohet edhe nga fakti që, deri tani, drejtuesit e Medresesë, i kanë penguar nxënësit të frekuentojnë xhaminë gjatë orarit të faljes, duke hartuar një orar mësimor që ua pamundëson faljen me xhemat në kohën e duhur. E gjithë kjo bëhet pa dyshim, për shkak të qendrimeve të tyre hermetike, duke dashur që t’i pengojnë nxënësit nga ndikimi i besimtarëve në xhemat. Mirpo e gjithë kjo, u ka rezultuar me një kosto shumë herë më të madhe se ç’e kanë menduar, duke u detyruar tashmë të tërhiqen nga të gjitha qendrimet e tyre arrrogante. Mbetet të shihet nëse ky pësim do të bëhet mësim për të kërkuar rrugët e duhura të mirëkuptimit me besimtarët.