Nga Tirana në Sarandë po mbyllen lokale 24 orëshe të cilat shqetësojnë publikun me volumin e lartë në orë të vona të gjumit. Teksa kjo është njoftuar në disa edicione lajmesh, një mik i vjetër më tregonte se kish vajtur një nga këto netë të falte namazin e natës në Xhaminë e Xhurës, një xhami e rrethuar me pallate në një nga lagjet historikisht të varfëra të Tiranës. Duke qenë se xhamitë e Tiranës prej vitesh nuk ofrojnë hapsirën e nevojshme për të akomoduar beimtarët, altoparlantët janë vendosur jashtë, në mënyrë që ata që nuk mund të falen brenda xhamisë të kenë mundësi të ndjekin recitimin e Kuranit në faljet e gjata gjer në orët e mëngjesit në dhjetë ditët e fundit të Ramazanit. Teksa kemi vendosur pankarta në katër anët e qytetit duke kujtuar banorët e kryeqytetit se ky është muaj i harmonisë, faljes e i mëshirës, a kemi menduar se për kaq e kaq banorë pa ndjeshmëri fetare si tonat, këta altoparlantë pengojnë gjumin e pushimin e natyrshëm të natës? Për këta banorë që u duhet të ngrihen herët në mëngjes për të vajtur në punë, a ka sjellë Ramazani harmoni e falje në lagjen e tyre apo shqetësim e lodhje?

Këtu tek EZN është hapur këto ditë debati mbi taravitë e propozuara në bulevardin e Tiranës dhe thirjen për mbylljen e xhamive, gjë për të cilën kemi bërë të qartë se nuk mendojmë se është një ide e mirë, mendim që e kemi dëgjuar në shumë rrethe myslimanësh këto ditë.

Në këtë debat, komentuesi 00355 shkruante:

Tani, dalja ne bulevard per Nate Kadri ne kete drite duhet pare: si nje nisme e atyre personave qe botekuptimin fetar e kane pak te ngushte e ceket. Nese arsyeja do te ishte thjesht “s’ka vend ne xhami”, nje propozim i mire per t’u mbledhur bashke do te ishte “hajde ikim falemi t’gjithe bashke me i ven t’hapet ku s’na shofin shume njerez”. Por jo, te falurit ne mes te Tiranes tregon qarte deshiren per tu dukur. Kjo nuk eshte menyra e duhur per te pastruar zemren. Kjo nuk eshte as menyra e duhur per te bere davet.

Duke thene ne fillim se nje ene nuk mund te jape ate qe nuk e ka brenda, po shtoj se ne vija te trasha, lidhur me pjesen jopraktikante ose jobesimtare te popullit, nje menyre e mire daveti me duket qe imamet te edukojne xhematet qe gjithsecili te behet qytetar i ndergjegjshem, njeri i dobishem per te tjeret, njeri ku te tjeret te gjejne mbeshtetje, siguri, qetesi, fjale te buta, sjellje shembullore, kujdes per te mos rene ne gabim, kujdes per te qene moralisht korrekt, etj. Shkurt, besimtari te kultivoje virytet profetike tek vetja. Nje njeri i virtytshem nuk ka nevoje t’i therrase njerezit, se i vijne vete; nje xhemat i virtytshem pastaj, nuk do te kishte nevoje te priste naten e 27-te per t’i kujtuar njerezit se eshte ramazan apo se jemi edhe ne ketu.

Me dy fjale, kjo dalja ne shesh eshte perpjekje per paraqitje, por pa permbajtje.

Jam tërësisht dakort me këtë shënim por doja të kujtoja se para ca kohësh në këtë faqe kemi bërë thirje: Occupy Namazgjah. Atëherë, meqë e paskan merak djemtë (se janë vetëm djemë e nuk ka vajza) e kryesisë së KMSH-së, pse mos i falin taravitë  tek Namazgjaja?