Maskarada ekologjike kundër xhamisë





Namzgjaja-Tirane-copy-500x375Besnik Sinani

Njoftimi i ndërtimit të një xhamie të re në Tiranë, mbi njëzet vjet nga vënia e gurit të themelit, ka sjellë edhe ngritjen e zërave të kauzës së ruajtjes së pemëve dhe hapsirave publike. Dy prej tyre, Sazan Guri dhe Koloreto Cukali kanë marë hapa dhe kanë bërë thirrje për protesta kundër projektit. Të dy nuk mund të merren seriozisht.

Në Tiranë janë zënë pothuaj të gjitha hapsirat e gjelbërta dhe të tërë ne kemi qenë dëshmitarë, përfshi këta dy zotërinj. Pallate e restorante si kështjella (një prej këtyre restoranteve quhet literalisht ‘castelo’) kanë zënë shumë më tepër hapësira nga sa do përdoret për xhaminë, por z. Guri nuk merr fidanë e të nisë t’i mbjellë përballë këtyre restoranteve apo z. Cukali nuk bën thirrje të mblidhen njerëzia të protestojnë përballë pronarëve të pallateve e restoranteve mbrapa stadiumit – bie fjala. Ky shqetësim selektiv për pemët ka vetëm një shpjegim: myslimanët janë shenjestër e kollajtë dhe këta zotërinj dinë ku ta ngrenë zërin e protestës.

Ky alarm selektiv për disa pemë por jo për disa të tjera vjen së bashku me faktin se katedralja katolike u ndërtua në tokë të dhënë nga shteti, duke humbur një nga komplekset e fundit sportive të hapura për publikun, dhe katedralja ortodokse u ndërtua duke zënë parkun përgjatë Ministrisë së Mbrojtjes. Nuk pati asnjë lloj debati të ngjashëm me atë që po rrethon projektin e xhamisë në tokë të vetë. Për t’u habitur, edhe një shoqatë arkitektësh protestuan cilësinë arkitekturore të projektit, gjë që të bën të pyesësh ku kanë qenë këta zotërinj gjithë këto vite; a kanë parë ata c’është ndërtuar në Tiranë?

Ky pasion selektiv ekologjik ku myslimanët janë shenjestra e kollajtë shprehet me gjuhën e njohur të urrejtjes dhe paragjykimeve që është bërë normale në Shqipëri t’i mvishen besimtarëve myslimanë. Titulli i shkrimit të z. Cukali është “Bashkëjetesa e xhamisë me krimin.” Z. Cukali dhe më tej e quan ‘krim’ ndërtimin e xhamisë, ‘krim në emër të besimtarëve,’ ndërtimi i xhamisë ‘është demostrim force’, ca ‘besimtarë nuk janë qytetarë,’ ‘nuk u intereson interesi i qytetarëve’. Ka mjaftueshëm mllef për të mbushur kazanët e paragjykimeve të islamofobisë.

Nuk është e vërtetë ajo që thotë z. Cukali se besimtarët myslimanë nuk kanë treguar shqetësim për parkun, pemët apo edhe arkitekturën dhe kjo jo sot, por që kur u fol së pari për ndërtimin e xhamisë tek Namazgjaja – vetë emri i parkut e njeh si vendi për falje. Por z. Cukali, në emër të shqetësimit qytetar që ngre, nuk adreson faktin se besimtarët myslimanë falen jashtë cdo të premte e cdo Bajram, në të nxehtin e verës apo të ftohtin e dimrit dhe këta, vlen të kujtohet, janë qytetarë që kanë të drejtën e lirisë së praktikës fetare.

Duhet thënë se në prag të zgjedhjeve është edhe më shqetësuese se shpesh sulmet kundra xhamisë kanë ardhur nga organe të shtypit opozitar. Projekti i xhamisë, qysh nga njoftimi i parë nga ish-kreu i bashkisë, Edi Rama, e gjer tek inagurimi në prezencën e Berishës dhe Bashës së projektit aktual, kanë sjellë përplasjen e dy projekteve si pjesë e përplasjes politike dhe i ka dhënë nevojës së bashkësisë së besimtarëve myslimanë (edhe këta qytetarë të këtij vendi) një dimension të dëmshëm politik që ushqen më tej polarizimin fetar e politik. Kjo nuk është e shëndetshme.

Por për sa kohë që zërat që ngrihen kundër xhamisë nuk janë dëgjuar jo vetëm në prishjen e hapsirave ku u ndërtuan katedralet, por as që guxojnë të përballen me pronarët e lokaleve e pallateve të ndërtuara në parqe publike, atëherë gjuha e tyre kundër xhamisë është thjesht gjuhë e paragjykimeve anti-myslimane.

Comments

  • Besnik, une mendoj se keto pyetjet “ku ishe ti kur…” nuk kane peshe ne argument. Ato sherbejne me shume per te shantazhuar moralisht ate ke qe perballe. Mos me keqkupto, nuk them se e ke bere me qellim te keq por gjithsesi ngritja e artikullit mbi keto pyetje nuk e ben ate te mire.

    Se dyti, Cukali ka folur ashper por ato qe ai thote qendrojne te gjitha. I vetmi gabim eshte fakti se ai akuzon komunitetin e besimtareve muslimane qe nuk kane bere debat. Natyrisht qe nuk e di. Nuk pretendohet qe ai te lexoje rregullisht e-zanin apo jo? Ka aty edhe nje kritike, me te ashper mendoj une sesa duhet, per katedralen ortodokse. Pse nuk e ka bere me pare? Sepse Cukali eshte i ri ne “tregun” e opinionit ne Shqiperi. Ka filluar te shkruaje vetem keto vitet e fundit.

    Se treti. Nuk eshte e vertete qe nuk eshte reaguar kunder objekteve te tjera te kultit qe jane ndertuar ne vende te gabuara ne Tirane. Psh Ardian Klosi, nje tjeter aktivist ne ceshtjet ekologjike ka shkruar ne shtyp nje artikull kunder ndertimit te saj ne lulishten prapa PS-se. Ka ne te shume me teper animozitet ndaj fetares sesa ne artikullin e Cukalit.
    http://www.forumishqiptar.com/threads/12196-jeruzalemi-yne-nga-ardian-klosi

    Kane shkruar edhe te tjere dhe nese nuk gaboj nje grup arkitektesh dhe intelektualesh i bene nje kerkese Bashkise se Tiranes. Ndersa sa i perket katedrales katolike, ajo eshte ngritur heret dhe ndergjegjesimi ambientalist nder shqiptare ishte akoma i huaj atehere. Keto vite kane pare rritje te ketij ndergjegjesimi. Nje gje e mire kjo per te gjithe, perfshi edhe muslimanet.

    Te vijme tani tek pjesa me thelbesore e diskutimit: betonizimi i namazgjase. Ne fakt muslimanet duhet te jene te paret kunder kesaj. Pse? Sepse namazgjaja eshte konceptuar qe ne embrion si nje vend adhurimi publik ne natyre. Ne diskutimet qe jane bere ketu ne kohe kjo eshte permendur vetem shkarazi ose eshte eshte harruar qellimisht nga shumica. Por sipas meje nje diskutim mbi xhamine qe ndertohet ne namazgja duhet te filloje pikerisht nga kjo.

    Namazgjaja perben nje tradite qe muslimanet po ia vene kazmen me duart e veta. Valle a ishin aq te paditur te paret qe e linin ate te pa ndertuar ne nje kohe kur askush nuk i pengonte te ndertonin mbi te? Natyrisht qe jo por namzgjaja simbolizon adhurimin ne ambient adhurimin me te natyrshem, te drejtperdrejte e te lirshem. Nje lloj komunikimi te paperkufizuar nga materialet e ndertimit qe sado qellimmira ngelen perseri dore njerezore. Per me teper, nje ambient faljeje ne natyre flet nje gjuhe universale. Besimtaret e djeshem, te sotem e madje edhe ata pas mijra viteve me shume gjasa do te lexojne aty te njejtin mesazh ne ndryshim nga nje objekt kulti ndertimor qe u flet atyre me shume per estetiken historike te periudhes kur eshte ndertuar.

    Tani per kete forme mund te flitet gjate por per hir te diskutimit po kufizohem te them se ne traditen Islame jane mbajtur te dy format e adhurimit: ajo brenda mureve dhe ajo jashte tyre, pra ne natyre. Madje po te spekulojme pak mund te themi se shkaterrimi i namazgjase per te ndertuar mbi te nje objekt kulti nuk eshte vetem nje krim ekologjik por eshte edhe nje krim ndaj nje tradite te adhurimit ekologjik. Nje tradite kjo qe me shume gjasa nuk kthehet me me kete shkaterrim.

    • Besniku e di vete, po argumenti ‘ku ishe ti me pare’ nuk prek Koloreton si djale te ri ne gazetari, sa prek instancen e qytetarise qe ai po kerkon perbrendesoje per te kundershtuar “xhamine e krimit”.

      Historia e kesaj qytetarie te paqene ekologjke, qe Koloreto kerkon ta themeloje pikerisht permes refuzimit te xhamise, duke e kriminalizuar per me teper, eshte nje qytetari me tharmin e vete-rrenimit brenda. Ankesen ambientaliste te Koloretos eshte 1000% e sigurte se do ta perkrahin fashistet e vegjel qe i shohim te bubrrojne neper faqe elektronike gazetash, tipat qe thone “kjo eshte toka e Gjergjit, shporruni ne Anadoll”. Hap pak websitin e gazetave si Tema, Shekulli e fut ne motoret e kerkimit fjalet ‘xhami’, ‘namazgja’ dhe i sheh kush jane ambientaliste qe perkrahin Koloreton. Koloreto e di mire kete, se i has dhe i toleron perdite keta hijena si moderator ne Respublica. Hape pak Respublica-n dhe shih se Koloreto i ka pasion lajmet e shkurtra me hoxhallare e me turqini. Ky pasion ia ka veshtiresuar te formuloje si njeri shqetesimin e vete te pretenduar per lulishten. Nje proteste, qellimshem fyese si kjo e Koloretos, qofte edhe per 1 000 000 peme, nuk justifikon demet e parashikueshme qe mund te shkaktoje ne shoqeri.

      Ne kete vend fatkeqesite kane lulezuar cep e me cep, dhe nuk eshte e mundur qe thirrje te nxehta e fyese te jene hapi i duhur per ndergjegjesim qytetar. Keto thirrje polarizojne me shme. Besimtaret kane ulur koken dhe e kane pranuar xhamine, sepse nuk kane me luksin te zgjedhin, po do marrin c’u jepet, si te gjithe xhanem. Se qytetaria jone potenciale nuk mund te aktualizohet dot sa kohe qe partite e pushtetet ia arrijne te na percjne sipas feve, krahnave, prejardhjeve politike, si e si qe te mos behemi kurre shoqeri e te perballojme bashke te keqen. Koloreto e ka deren te hapur te kerkoje t’ia nisim dikur, te gjithe, me fe e pa fe, nje levizje qytetare, me kerkesa me te medha e me perfshirese sesa pengimi i xhamise, perfshire pengimin e saj ne Namazgja. Nese levizja do ishte e pergjithshme, dhe xhamia do ishte vetem nje pike e saj, ose te pakten nese gjuha do kishte qene tjeter, edhe mund te priste Koloretoja mirekuptim. Po jo kur shfrimi i tij i papergjegjshem i shtohet klimes se zakonshme te diferencimit te muslimaneve dhe prodhon viktimizim. Viktimizimi prodhon ekstremizem pastaj. Qytetaria eshte fillimisht barazi, dhe ec e mbushua mendjen njerezve te thjeshte se ka barazi ne Shqiperi kur qeveria 20 vjet premton xhamine, po nderton vetem katedrale (mbi lulishte publike e fusha sporti publike)

      Klosi e ka shkruar shkrimin qe solle pa u ndertuar katedralja, ne fushate te sinkronizuar ne media me ‘klubin 2000’, me Sabri Godo et al. Pas kesaj ajo qe ndodhi, ishte se peshkopi Janullatos i shkroi nje leter Xhirxh Bushit per vonimin e lejes, dhe katedralja u ndertua mu aty ku desh ai. Klosi e riperteriu shkrimin e vet, me gjuhe shume me te zbutur, dy vite me pare, fill pasi KMSh hodhi poshte projektin e Rames. Problemi eshte se edhe Selim Muces i punon gishti sa per t’i shkruar nje leter kolektive Obames, Erdoganit, Rasmusenit dhe Papes, dhe dalim aty ku ishim.

      Ne nje vend me histori te njohur ekuilibresh dhe deshtimesh te qytetarise nuk mund te vish si nga hici e te besh si inteligjent, as si clirimtar i pyllit, se te gjithe e dime mire c’eshte namazgjaja, parku apo qyteti i shkretuar i Tiranes

      • Darik une nuk arrij ta shoh qofte potencialin e shantazhit tek ajo qe kam shkruar e sigurisht nuk perdor forume publike per te bere muhabete individuale. Autorin e shkrimit qe i referohem nuk e njoh dhe merem me ate qe ai thote. Ajo qe nuk pranoj nga ty e askush ne fakt eshte pranimi sportiv i gjuhes te urrejtjes. Ti thua: ‘Se dyti, Cukali ka folur ashper por ato qe ai thote qendrojne te gjitha.”

        Nuk ka asgje te vertete ne kriminalizimin e nje bashkesie e tempujve te saj. Asgje. Nuk ka asgje te vertete ne dualitetin reduktiv te vendosur nga autori: je qytetar apo besimtar. Ne te kundert, kjo gjuhe eshte moralisht e denueshme per bigotrine qe mbart ndaj kujtdo bashkesie qe perdoret e ne Shqiperi dihet qe kjo i rezervohet myslimaneve.

        E ke gabim kur thua se thelbi eshte betonizimi i namazgjase. Betonizimi i namazgjase eshte pjese e betonizimit te te gjithe Tiranes e myslimanet shqiptare nuk mbajne as faturen e as taksimin e kesaj masakre. Kush e ka ndjekur kete debat qe ka mbi nje vit ketu, mund te kete vene re qe une nuk kam qene per ndertimin tek namazgjaja. Te qenit park eshte nje arsye, te qenit namazgja eshte nje tjeter dhe vete nuk besoj tek tjetersimi i paautorizuar i vakefit. Gjithashtu kush e ka ndjekur mudn te kete vene re qe kam menduar se as nga ana arkitekturore ky projekt – ne gjykimin tim- nuk eshte i duhuri. Por ama, mund te kete shume mendime, por se fundmi keto gjera vendosen nga insititucionet perfaqsuese te myslimaneve ne mareveshje me institucionet perkatese shtetrore se s’ka si te jete ndryshe. Debati eshte pertej kesaj pike.

        Nje sqarim. Ktheju artikullit dhe do shohesh qe nuk them gjekundi qe nuk ka patur debat per katedralen ortodokse. Kam thene qe nuk ka patur asgje te ngjashme me debatin rreth xhamise. Ti permend nje artikull te te ndjerit Klosi dhe e mbaja mend. Tani, sa artikuj do te te sjell per xhamine si shprehje e rrezikut neo-otoman, nje debat qe ju kushtua edhe nje emision tek Opinion. Nuk mund te propozosh krahasime ketu se edhe Lubonja tek Opinion tha qe vonesa e xhamise eshte shprehje e paragjykimeve ndaj islamit.

        Thua qe Cukali nuk mund te lexoje per dite e-zani. Cukali ka obligimin profesional qe kur deklaron dicka ne publik (nuk ka patur debat mes myslimaneve, pretendon ai) te informohet. Mjafton te perdoresh search engines.

        Ne keto kushte, eshte faktikisht e kote te thuash qe e oponentet e kane per mbrojtjen e parkut e nuk e kane me xhamine sepse ne menyre faktike kjo eshte oponence ndaj xhamise. Nuk ka vend tjeter per tu ngritur dhe ajo qe propozoi bashkia e kaluar, nuk do kete mysliman me dy gram fe qe do pranoj te ndertohet ne nje toke pa pranuar pronaret e tokes. Te duash te kesh xhami apo kishe apo cfare te jete, nuk eshte demonstrim force por eshte e drejta per te gezuar lirine e besimit. O e njohim o nuk e njohim.

        • Besnik. Une mendoj se muslimanet nuk duhet te futen ne llogore e te gjejne kauze sepse te tjeret po sillen ashper me artikuj. Aq me teper ata te cilet kane qene e jane klunder ketij projekti. Nuk funksionon keshtu kjo pune. Kur e kundershtojne personat brenda grupit eshte e drejte e kur e kundershtojne ata jashte grupit eshte e gabuar. Nje nga arsyet pse deshtoi emisoni Opinion, sipas mendimit tim, ishte pikerisht kjo. Pala muslimane, te themi keshtu, nuk pranoi asnje kritike. Jo pse ata nuk kishin kapacitetin intelektual per ta pranuar ate. Por sepse e pane veten te kercenuar. U ndihen te kercenuar lehtshem fare e pa nevoje. Ja ky eshte problemi. Do ndertojne muslimanet nje subkulture te diskriminuarish apo do fillojne te marrin nje rol me proaktiv ne shoqeri?

          Tani une e kuptoj qe ky eshte nje debat i gjere (ndoshta me i gjeri ne kushtet ku gjenden muslimanet ne Shqiperi) sepse shumekush mund te thote se premisat nuk jane te tilla e se muslimanet realisht gjenden vend e pavend nen nje presion shpesh here dashakeqes. Patjeter qe kjo qendron por kjo eshte sfida. Se kur dikush ta shtron me te mira nuk aty as nje sfide e per me teper asnje merite. Pra pyetja qe shtrohet eshte kjo. Do ngrihen muslimanet ne nivelin e sfides apo do dorezohen dhe te marrin rolin e viktimes qe me pas reagon dhunshem sic e ka shprehur Robin Hoodi me siper.

          Cukalin as une nuk e njoh personalisht. Nuk po mbroj ate ketu e as ata qe i vijne mbrapa. Por si lexues ve re se edhe ai po viktimizohet duke ndjekur ciklin e opinionisteve ne Shqiperi qe vjen nje pike e frustimi shperthen duke folur ashper e ndoshta edhe pa vend. Por sidoqofte e perseris se artikulli i tij qendron fort. Ai po thote se po behet nje krim ekologjik ne emer te nje xhamie. Pra krim ekologjik. Psh ti nuk mendon se po behet krim ekologjik aty? Une mendoj se po. Madje mendoj se vec kesaj po behet nje krim me duart tona kundrejt nje tradite te cmuar tonen qe ne vend t’ia transmetojme shoqerise dhe brezave qe do te vine vemi e behemi pjese e kultures me te keqe qe po kalon kjo shoqeri ne keto dekada. Te mos mbytemi me nje luge uje se u permend fjala krim. Ka krim e krim, krim ndaj personit, ndaj prones krim ekologjik e krim estetik (sic eshte edhe projekti i propozuar). Ndersa persa i perket ceshtjes se qytetarise Cukali nuk permend gjekundi qe gjithe besimtaret nuk jane qytetare. Ai thote qe disa prej tyre ndihen me shume besimtar sesa qytetare. Psh ti nuk mendon keshtu?

          Vend per xhamine e re ka pasur dhe ka. Mjafton te rilexosh komentet qe jane bere dhe ka disa alternativa. Keshtu qe ky qendrim radikal tani nuk me duket me vend. Une besoj se ka akoma kohe edhe per nje rikthim te projektit duke filluar nga hapi i pare, ai i berjes se nje konkursi.

          • Te lutem lexo mire Darik. Kam thene tekstualisht: “Viktimizimi prodhon ekstremizem pastaj”. Dhunen e shtove ti. Ekstremizmi eshte ektremizem, dhuna eshte dhne. Kur Koloreto permend fjalen ‘krim’, ti ke zemergjeresine ta zbusesh fjalen, ndonese eshte krejt pa vend prane fjales xhami, kurse ektremizmin e ben direkt dhune. Edhe ti ke paragjykime.

            Nese do jemi te ndershem, duke filluar qe nga Koloretoja, duhet te themi se po pati krim ne ne ekologji, ky krim ENDE nuk eshte konsumuar tek namazgjaja. E vetmja qe bashkejeton me krimin ekologjik sot per sot eshte katedralja ortodokse e ndertuar ne lulishte PUBLIKE. Koloreto sheh krim aty ku do, dhe aty ku nuk ka, sepse ashtu deshiron. Dhe ti e justifikon kriminalizimin e tij publik te xhamise, dhe vjen e kriminalizon fjale komentesh ketu.
            Shqetesimi i Koleroteos nuk eshte shqetesim vetem per gjelberimin, eshte shqetesim per ngritjen e xhamise GJITHASHTU. Ai thote cope se nuk ka nevoje per xhami, se kjo eshte per “shperfaqje force”. KAUZA E TIJ u vetekriminalizua PERFUNDIMISHT. Kush i shkon pas asaj eshte sigurisht kunder ndertimit te xhamise. Koloreto me vanitetin e vet dhe me gjuhen e forces, e DOGJI rastin per nje diskutim normal. Une do jem atje me dhjete veta thote. Ok, ne do jemi me 10 000 po aty.

            Po te fliste me shtruar, me me ndershem, si qytetar e mbrojtes i mjedisit, pa na dhene mend nese kemi apo jo nevoje per xhami, pa e kriminalizuar xhamine. shqetesimi i tij do ishte degjuar me kujdes e me simpati. Por muslimanet qe kane kritikuar projektim e KMSh, nuk mund te behen lodra te atyre qe fshihen pas pemeve per te mos lejuar xhamine, se iu prish imazhin e kryeqytetit europian.

            Bravo Koloretos e te gjithe atyre qe na detyrojne me ekstremizmin e vet te bashkohemi si nje grusht i vetem rreth KMSh-ne, me ne krye inxhinierin e pyjeve Selim Muca, ndonese na vjen per te vjelle kur e shohim

  • Me nje ndryshim te vogel, Darik, se i ndjeri Klosi ne kete artikull e ka merak edhe demin simboliko-ekologjk te xhamise. Pra, nese Cukali i kundervihet ekskluzivisht xhamise, Klosi nuk reduktohet tek Kisha. Prandaj Sinani ka te drejte kur thote se ku ishin keto zoterinj kur u ndertuan katedralet. Pastaj te krijosh paralelizma mes xhamise dhe krimit eshte ofenduese dhe shkon pertej shqetesimit te ekuilibruar te Klosit. Nese Cukali eshte kaq ekologjist do te mbronte malet e kodrat nga mbjellja e simbolikave fetare.

      • Kur lexon njeriu titullin “Bashkejetesa e xhamise me krimin” mendon per ndonje situate ku nje xhami sherben si mburoje per trafik droge, apo strehon kriminele te kerkuar nga policia, si manastiret serbe te Kosoves qe i dhane azil krimneleve te luftes. Po ne fakt behet fjale per nje lulishte, prone te xhamise, qe do u beka xhami. Pemet nuk do priten, po do nxirren per t’u mbjelle aty prane. Ky qenka krimi.

        Edhe sikur te jete krim, nuk eshte i xhamise, po eshte i shtetit, i bashkise, i keshillitit te rregullimit te territorit qe dhane leje. Ato jane institucione te te gjitheve, kane specialiste e perfaqesojne qeverine, e Koloreto Cukali le te merret me to, jo me vrap kunder xhamise. Shyqyr qe iu dha rasti.

        nje gazete qe mban ne faqet e veta keshtu pacavuresh tendencioze nuk mund te falenderohet per asgje

      • Cukali kalon boton dhe komente te Zotit Tedeschini mos duhet falenderuar per kete? Ty te duket kompliment kur tjetri te etiketon si kriminel, i korruptuar me the te thashe?
        Aman se hi nga syte nuk na hidhni dot as t’i as Cukali.
        Rrespekte e mia.

  • Une personalisht ndihem shume i fyer nga toni dhe gjuha e Cukalit. Une jam edhe besimtar edhe qytetar i Tiranes. Ne rrethana normale do doja te kisha edhe parkun edhe xhamine, por duke e ditur shume mire qe hapesira te tjera te lira per xhami te madhe ne Tirane nuk ka, me mbetet te kenaqem me projektin ekzistues.
    Edhe besimtareve u dhemb ne shpirt prishja e nje parku, apo prerja e nje peme z. Cukali, dhe te pakten marr shprese nga premtimi i KMSH se selvite do ruhen sa te jete e mundur dhe ato qe do hiqen nuk do priten por zhvendosen e per me teper xhamia do rrethohet serish me gjelberim dhe qindra fidane do mbillen neper Tirane si kompensim.
    Per ne si besimtare eshte fyese te na mohoet e drejta qytetare e te pasurit nje ambjent dinjitoz ku te kryejme ritet tona fetare. Kalo pak nga xhamia e Et’hem Beut te premten ne dreke z. Cukali dhe me thuaj a te duket “qytetare” menyra si detyrohen besimtaret te falen ne trotuar e ne rruge te madhe mes makinave e kalimtareve, mes zhurmes e pluhurit????

  • Your email address will not be published. Required fields are marked *