Kadare_sokakuH. Omari

 

“Në fund të fundit është një projekt i hershëm serb, famëkeqi drafti i Cubriloviçit, i cili ka parashtruar rrugën për të tërhequr në kurth shqiptarët. Thelbi i kurthit ka qenë armiqësimi shqiptarë – Evropë. Në këtë draft, një vend i veçantë i kushtohej rolit që do të luanin imamët dhe hoxhallarët e Kosovës për shpërnguljen e një pjese të kombit shqiptar jashtë Evropës, dhe sidomos për turqizimin e tij”.

Ky fragment nga intervista e fundit e Kadaresë (dhënë për Zëri-n) ka qarkulluar dendur thuajse në të gjitha mediat e shkruara shqiptare. Panorama e plas në hyrje formulën: “pjesë e draftit, roli që do të luanin imamët dhe hoxhallarët e Kosovës”. Drafti ka shumë pjesë, përse nënvizohet pikërisht kjo? Përse nuk shoqërohet me sqarimin e klimës së terrorit të teorizuar nga ideologu serb? Perse nuk citohet se shkatërrimi i identitetit fetar islam të shqiptarëve të Kosovës, në mendjen e Čubrilović-it, do të mundësonte spastrimin e trevës shqiptare? Përse nuk thuhet se ndaj imamëve do të drejtohej (edhe) dhuna? Mbase mund të shërbejnë disa saktësime nga memorandumi Dëbimi i shqiptarëve, i prezantuar në Beograd më 7 mars 1937 nga Vaso Čubrilović.

“Është fakt i njohur”, shkruan Čubrilović, “se masat myslimane janë përgjithësisht të influencuara nga feja […] besëtytnitë dhe fanatizmi”. Prandaj “ne duhet fillimisht të kontrollojmë klerin dhe njerëzit me influencë përmes parave dhe kërcënimeve për të siguruar mbështetjen e tyre në dëbimin e shqiptarëve”.

Bashkëpunimi kushtëzohet nga të hollat dhe nga dhuna. Nuk ka dyshim që feja mund të lehtësonte joshjen e shqiptarëve për t’u larguar drejt Turqisë dhe kjo mund të nxitej nga kleri, por nuk mund të përkthehet si ndërmjetësim i vullnetshëm, i natyrshëm për klerin ose fenë islame në përgjithësi. Mos të harrohet se udhëheqësit e Lidhjes së Prizrenit dhe të Lidhjes së Pejës vinin nga tradita klerikale islame. Mirëpo Kadare nuk thellohet më tej, duke ndikuar në krijimin e imagjinatës së një kleri mysliman kosovar të prirë drejt bashkëpunimit me shovinizmin serb. Më shumë se rol që do të luanin imamët, për korrektesë do të duhej të konsiderohej si roli që u imponohej imamëve nga ideologu serb.

Čubrilović-i e zhvlerëson pretendimin e Kadaresë me dy paragrafët vijues, të cilët përmbledhin thelbin e vërtetë të mekanizmit dëbues. Ai e shtjellon memorandumin e tij racist me domosdoshmërinë e ndërhyrjes imponuese të aparateve shtetërore. Ligjet mund t’ua “bëjnë shqiptarëve jetesën të pamundur: gjoba, burgosje, aplikim i pamëshirshëm i kontrollit policor, si p.sh ndalimi i kontrabandës, prerja e pyjeve, dëmtimi i bujqësisë […], puna e detyruar dhe çdo masë tjetër që një forcë policore e duhur mund të imponojë; nga pikëpamja ekonomike, kjo duhet të përfshijë mosnjohjen e pronave të vjetra […], sekuestrimin e kullotave publike, anulimin e koncesioneve, tërheqjen e lejeve të ushtrimit të punës, përjashtime nga drejtimi, privat dhe administrata lokale; […] rrënimi i mureve rrethuese të shtëpive”.

Për ta ushqyer më tej ferrin Čubrilović-i i kushton një paragraf aksionit të popullsive lokale sllave kundër shqiptarëve:

“ne duhet t’u shpërndajmë armë kolonëve tanë […], të organizojmë format e vjetra të aksionit çetnik […], të nxisim një dyndje masive të malazezëve në mënyrë që të krijohet një konflikt i gjerë me shqiptarët e Metohisë”.

Pastaj ai rikthehet sërish tek feja. “Shqiptarët janë shumë të ndjeshëm për sa i takon fesë”, shkruan ai. Tërthorazi kuptohet se shqiptarët e Kosovës së asaj periudhe kishin identitet fetar të theksuar dhe ideologu serb teorizon shkatërrimin e tij, por jo ekzaltimin, siç, në të kundërt, fantazon i painformuari Kadare. Do të thotë se feja i bën të rrezikshëm, i pajis me identitet dhe natyrisht i përjashton.

Madje kolegu kroat i Čubrilović-it, Ivo Andrić-i, i dekoruar me Nobel në letërsi, kur propozon një draft për ri-ndarjen e trevave shqiptare (1939), nënvizon se shqiptarët myslimanë janë problemi i vërtetë për asimilimin. Nga kjo ndarje: “ne do të kemi rreth 200.000-300.000 shqiptarë, por këto janë në shumicë katolikë, marrëdhëniet e të cilëve me shqiptarët myslimanë nuk kanë qenë kurrë të mira; deportimi i shqiptarëve myslimanë në Turqi mund të vazhdojë kështu […] pa pengesa serioze”. Pra për Andrić-in të përjashtueshmit janë shqiptarët myslimanë, ndërsa tek katolikët ai shikon një farë aleati, për t’u shfrytëzuar kundër myslimanëve. Kjo mbase nga prapavija fetare e vetë autorit. Megjithatë çdo tentativë e ndonjë intelektuali shqiptar për ta bërë kapital këtë filokatolicizëm të shprehur në racizmin e Andrić-it do të ishte vërtet shërbimi më i mirë ndaj këtyre tezave perverse. Është e habitshme, nga ana tjetër, se si Kadareja shfaqet përherë në pararojë kur “duhen” interpretuar fetarisht tezat e racizmit serb në stilin e Čubrilović-it. Të paktën të interpretohen në kontekst dhe në tërësi e jo duke përzgjedhur disa fragmente në funksion të skemave, për më tepër të lexuar si akuza ndaj përfaqësuesve të myslimanëve të Kosovës.

“Ata [myslimanët]”, vazhdon Čubrilović-i, “duhet të shënjestrohen edhe në këtë aspekt: diçka e tillë mund të arrihet përmes keqtrajtimit të klerit, shkatërrimit të varrezave, ndalimin e poligamisë dhe veçanërisht […] aplikimin e shkollimit fillor të vajzave”.

Për ironi, më me përpikmëri se sa nga serbët, të gjitha këta metoda janë aplikuar gjerësisht nga regjimi enverist në Shqipëri, nga ai regjim për të cilin Kadare punoi me devotshmëri, për t’ia transformuar masës shqiptare memorien dhe botëkuptimin.

Në këtë mënyrë, për Čubrilović-in, feja islame dhe kleri i saj janë në krye të herës ndër pengesat kryesore në deshqiptarizimin e Kosovës. Një popullsi e terrorizuar me metodat e sipërcituara nuk mund të fajësohet sepse u largua në një vend që e priti për 1000 mijë motive, si p.sh oreksi demografik i Turqisë, lidhjet historike dhe amortizatorët kulturorë. Të iknin apo të dhunoheshin siç teorizon Čubrilović-i?

A mund të fajësohen arbrit e larguar në shtetet italiane në fund të shek. XV? Po kleri që e udhëhoqi këtë “varfërim demografik” të vendit? Duhen fajësuar venedikasit dhe aragonezët që pasi i shfrytëzuan kundër osmanëve i strehuan në tokat italiane të boshatisura nga murtaja? E as nuk duhen përgëzuar për ndonjë tolerancë, sepse i konvertuan nga ortodoksë në katolikë të ritit bizantin. Për ndryshe do të përfundonin si valdezët. Kush nuk e mbajti ritin bizantin sigurisht që u tjetërsua përfundimisht.

Kadareja është personi i fundit në botën shqiptare që ka tagrin të gjykojë të tjerët për dorëzim apo bashkëpunim. Ka pasur klerikë mysliman që janë vrarë nga represioni serb, siç ka pasur të tjerë që kanë bashkëpunuar, nga frika ose nga interesi, por vetë Kadareja është pjesëtar i “klerit” laiko-intelektual që bashkëpunoi me regjimin enverist, ku nga frika e ku nga karriera, ndërsa kolegët e panënshtruar burgoseshin, internoheshin e vriteshin.

Ai nuk mund të spekulojë me instinktet njerëzore të mbijetesës, sikur shqiptarët e Kosovës po zgjidhnin mes Turqisë apo turqizmit oriental dhe Europës apo vlerave perëndimore. Ata që ikën, zgjodhën mes integrimit/shpëtimit dhe terrorit, mes lidhjeve me turqizmin dhe armiqve të tij me kryq në flamur. Pastaj, nëse ky integrim ishte nihilist për identitetin shqiptar, i turpshëm sepse oriental, kjo është logjikë e pavlerë përpara lirisë për të jetuar denjësisht.

 

Comments

  • Pergezime autorit. Shperndarja e ketij trakti te Kadarese eshte tregues gjithashtu i shkalles se mediave shqiptare te cilat per hir te integritetit profesional ja kane borxh lexuesit nje kontekst ku cdo deklarim i Kadarese per Islamin, muslimanet, hoxhallaret duhet te filloje duke perkujtuar qe Kadare e ka quajtur miresi ndalimin e fese ne Shqiperi sepse do sillte c’islamizimin e shqiptareve dhe se edhe kur Ramiz Alia po pergatitej te ndalonte penalizimin e besimit fetar, ai i beri thirrje qe mos lejohej hapja e xhamive. Ndyresire e totalitarizmit!

    Pretendimi i Kadarese, gjithashtu, eshte se tezat e Cubrillovicit informojne politikat serbe edhe sot. Atehere si shpjegohen qindra xhami te djegura e te rrenuara gjate luftes ne Kosove? Nese Kadare do kishte te drejte, serbet do duhej te kishin ngritur xhamie e jo ti rrenonin.

  • Shtremberimi i pare eshte pretendimi i Kadarese se thelbi i projektit te Cubriloviçit ishte bashkepunimi me klerin mysliman. Thelbi, ne fakt, eshte spastrimi etnik i Kosoves. Objektivi do te arrihej permes veshtiresimit ne ekstrem te kushteve te jetes per shqiptaret. Thelbi i objektivit te Cubrilovicit eshte dhuna, e cila mund te shoqerohej me krijimin e nje dritareje shpetimi te shqiptareve, qe do te ishte Turqia. Ne fakt Turqia nuk i hapte dyert per dashuri ndaj shqiptareve.
    S’ka dyshim se kleri mund te shnderrohej ne mjet per realizimin e objektivit te Cubrilovicit, por nuk ishte ky thelbi. Dhe shnderrimi ne mjet parashikohej te arrihej me force dhe pagese.

    Me vjen keq qe mediat shqiptare jo vetem e percjellin lajmin sikur te fliste ndonje profet i marredhenieve gjepolitike apo i historise ballkanike te shek. XIX-XX, por i modifikojne citimet dhe pohimet e Kadarese akoma me teper, duke nenvizuar denigrimin e kelrit mysliman dhe fajesimin e islamit.

    Te vjen keq gjithashtu nga ata hoxhallare te sotem te Kosoves qe zhurmojne per ceshtje pa pike rendesie publike dhe nuk e mbrojne dot veten ndaj akuzave te tilla, te renda e te hapura.

  • Kadareja, si pretendent per fronin e babait modern te kombit, eshte gjithashtu edhe kryehistorian i Shqiperise. Por, sado te jete shkrimtar i mire, ne politike, histori, filozofi etj. eshte njeri shume i prapambetur dhe reflekton tezat me te tejkaluara te mendimit shkencor perendimor. Sprovat ideologjike te Kadarese reflektojne mentalitet racist, konfliktual, mitoman, megaloman. E gjithe perpjekja intelektuale e Kadarese ka per qellim krijimin e stereotipeve me te cilat shqiptaret te identifikojne “armikun e brendshem”, duke prodhuar nje sensibilitet qe ngre nje pjese te madhe shqiptaresh kundra nje tjetre. Kjo eshte krejtesisht antikombetare.

  • dmth. Kadareja qenka ne te njejten linje me Cubrilovicin per diskreditimin e hoxhallareve shqiptare ne Kosove…

  • Sa i perket qasjes ndaj shqiptareve musliman,Kadareja nuk dallon prej Cubrilloviqit.Atehere,si mund te pretendoj dikush “baballekun” e kombit e ndaj pjeses me te madhe te tije sillet keshtu?

    • Nuk është në natyrën time të ofendoj të tjerët.
      Ju kërkoj ndjesë e në rradhë të parë H Omarit për gabimin në shkrim. Gjatë shkrimit më ishte ngulitur, gabimisht, emri Gaz, Gazmend.
      Edhe një herë i kërkoj ndjesë H Omarit.

      Me Respekt
      M Gojani

  • Thelbi i kurthit ka qënë armiqësimi shqiptarë-Europë

    Ju mund të mashtroni gjithë popullin për një periudhë kohe,
    madje ju mund të mashtroni një pjesë të popullit gjatë gjithë kohës,
    por jo të mashtroni gjithë popullin për gjithë kohën.
    Abraham Linkoln

    Shkrimi [1] në lidhje me intervistën e dhënë Zëri-t të Prishtinës nga I.Kadare, nis me frazën
    “Shkrimtari: Rritja e disa grupeve antiperëndimore mes shqiptarëve, të indoktrinuar nga ideologji ekstremiste fetare është një akt mosmirënjohje. Ky është projekt i hershëm serb, famëkeqi draft i Çubriloviçit për të larguar shqiptarët nga Europa …”
    Dhe më poshtë: “… ky është një projekt i hershëm serb. Famëkeqi drafti i Çubriloviçit, i cili ka parashtruar rrugën për të tërhequr në kurth shqiptarët. Thelbi i kurthit ka qënë armiqësimi shqiptarë-Europë. Në këtë draft, një vend i veçantë i kushtohej rolit që do të luanin imamët dhe hoxhallarët e Kosovës për shpërnguljen e një pjese të kombit shqiptar jashtë Europës. Dhe sidomos për turqizimin e tij” …
    Cituar nga H Omari [2] “Në fund të fundit është një projekt i hershëm serb, famëkeqi drafti i Çubriloviçit, i cili … ”

    Duke zëvëndësuar Ky (për projektin) me Në fund të fundit (një ndryshim fare i pa rëndësishëm !?), autori i shkrimit nis rrugën për arritjen e qëllimit: Kadareja-manipulator i së vërtetës, pasi këto fjalë janë të Kadaresë e jo të Projektit serb për shpërnguljen e shqiptarëve nga Kosova. Në këtë mënyrë aludohet, krijohet iluzioni, që të gjitha të tjerat që thotë ky (Kadareja) janë në mos pallavra, gënjeshyra e manipulime.
    I.Kadare është ai që është, njeri komleks, me të mirat dhe të këqiat e tij, me frikën dhe guximin që karakterizon sejcilin prej nesh njerzve të vdekshëm, me gjynahet dhe bamirësit e tija, por, mendoj e besoj që, qëllimi i H Omarit nuk është kritika ndaj Kadaresë, se sa idhullimi i perandorisë osmane dhe mbrojtja e idesë se ajo (perandoria osmane) dhe islamizimi i shqiptarëve ishte shpëtimi i Shqipërisë para një shekulli e është edhe sot. Dhe nuk vonon të shpalosë idetë, do të thoja jo të tijat, duke komentuar Çubrilloviç-in si t’i nevojitet diku drejt e diku me pak trasformime.

    Paraprakisht do t’i kujtoj H Omarit dhe atyre që mendojnë, ose nuk mendojnë, si ai, tezën e mbrojtur se, mysylmanizimi në Shqipëri është bërë vullnetarisht. Dhe e spiegon më së miri fraza e sjellë prej tij:
    “Bashkëpunimi (i klerikëve mysylmanë) kushtëzohet nga të hollat dhe nga dhuna. Nuk ka dyshim që feja mund të lehtësonte joshjen e shqiptarëve për t’u larguar drejt Turqisë dhe kjo mund të nxitej nga kleri, por nuk mund të përkthehet si ndërmjetësim i vullnetshëm, i natyrshëm për klerin ose fenë islame në përgjithësi.”
    që është më se e vërtetë dhe jam dakort me perfundimin e autorit. Por menjëherë më tej na kujton se udhëheqësit e Lidhjes së Prizrenit e Pejës vinin nga kleri islam, duke harruar, sigurisht pa dashje, se ato u krijuan me inisiativën e Portës së Lartë, pa çka se ato Lidhje më vonë i dolën nga dora.

    Nuk kam qëllim të analizoj qëndrimin e klerit mysylman në historinë e Shqipërisë, pasi ka patur hoxhallarë e imamë patriot që kanë dhënë edhe jetën për Shqipërinë, ashtu siç ka patur edhe renegatë, që nga dija apo padija, kanë luajtur rolin e kundërt e ashtu siç ka edhe sot ndonjë që pyet me naivitet të shtirur se kush osht non’ Tereza, ça ka bo non’ Tereza për Shqipnin’ apo edhe pseudostudiues që hedhin baltë mbi figura simbol si Skënderbeu, Pjetër Bogdani etj, figura, me të cilat është frymëzuar kombëtarizimi shqiptar.
    Më tej H Omari sqaron, analizon, spjegon planin dhe qëllimin e Çubrilloviç-it, në tre drejtime, atë ekonomik (për t’i varfëruar shqiptarët), atë politik (duke aktivizuar kolonët serb e malazez kundra shqiptarëve) dhe atë fetar “Shqiptarët janë shumë të ndjeshëm për sa i takon fesë”. Qartë, asgjë për tu çuditur. Është strategjia dhe taktika e studiuar e Çubrilloviç-It dhe nuk mund të pritet gjë tjetër nga ai.
    Por është për tu çuditur komenti më poshtë i bërë nga autori. Ai komenton Andriç-in me “shqiptarët myslimanë janë problem i vërtetë për asimilimin” Pastaj citon Andriç-in për të cilin janë “rreth 200.000-300.000 shqiptarë, por këto janë në shumicë katolikë, marrëdhëniet e të cilëve me shqiptarët myslimanë nuk kanë qenë kurrë të mira; deportimi i shqiptarëve myslimanë në Turqi mund të vazhdojë kështu […] pa pengesa serioze”.

    Pra për H Omarin, Andriç ka patur ndër mend të thotë, shkruajë se për myslimanët është i vështirë asimilimi, ndërsa shumica e 200-300 mijë shqiptarëve, që janë katolikët nuk janë problem, pasi nënkuptohet që i kemi aleatë e edhe mund t’i perdorim kundër mysylmanëve. Vazhdon komenti me përdredhje e tymhedhje të paqarta rreth ndonjë intelektuali që do të bëjë kapital me filokatolicizmin e racizmit të Andriç-it.
    Problemi është fare i thjeshtë. Serbët zyrtarisht kanë kufij të përcaktuar, duan që shqiptarët të çvendosen prej aty me çfardo mënyre dhe formulojnë politikat e tyre raciste për këtë qëllim: vështirësi ekonomike, sociale e fetare. Vështirësitë ekonomike e sociale janë njësoj si për katolikët ashtu edhe për mysylmanët. Lidhur me perkatësinë fetare: mysylmanët e ka të vështirë t’i asimilojë, kështu bën marrëveshje me Turqinë për deportimin e tyre në Anadoll dhe Turqia është e gatshme; katolikët nuk ka ku t’i çojë dhe shqetësimi i tij duket kur e pohon se shumica e 200-300 mijëve janë katolikë ndërsa për deportimin e myslimanëve nuk ka pengesa.
    Për mos me e zgjat më tepër vazhdon një seri paralelizmash me komunizmin, enverizmin dhe pa dashje pohon (nuk besoj që H Omari të mendojë me të vertetë kështu)
    se “për Čubrilović-in, feja islame dhe kleri i saj janë në krye të herës ndër pengesat kryesore në deshqiptarizimin e Kosovës” (ndërkohë dhjetë rreshta më sipër ka thënë që deportimi në Turqi i mysylmanëve nuk përbën pengesë);
    se “Ata [myslimanët]”, vazhdon Čubrilović-i, “duhet të shënjestrohen edhe në këtë aspekt: diçka e tillë mund të arrihet përmes keqtrajtimit të klerit, shkatërrimit të varrezave, ndalimin e poligamisë dhe veçanërisht […] aplikimin e shkollimit fillor të vajzave”.(siç duket H Omari është dakord me poligaminë dhe kundër shkollimit të vajzave)
    Pastaj vjen pyetja “Të iknin apo të dhunoheshin siç teorizon Čubrilović-i?” e natyrisht është edhe përgjigja:
    “Një popullsi e terrorizuar me metodat e sipërcituara nuk mund të fajësohet sepse u largua në një vend që e priti për 1000 mijë motive, si p.sh oreksi demografik i Turqisë, lidhjet historike dhe amortizatorët kulturorë.”

    Pyetja me qëllim të mbrapësht, për të arritur në përgjigjen po aq të mbrapsht të dhënë më sipër, e po aq antishqiptare, për të vetmen arsye se ndjell hasmërinë ndër shqiptarët, ndarjen e tyre në mysylman e kristian.
    ASKUSH nuk fajëson shqiptarët e shpërngulur në Turqi. Askush nuk fajëson zgjedhjet individuale të detyruara ose jo. Askush nuk fajëson pse Nikolla u bë Hasan e më pas stërniprit e Nikollës u turqizuan. Fajtorë janë ato fuqi që e organizuan, ata persona e individë që për interesa meskine morën pjesë në këtë lojë, që luajtën me këto fate njerzish. që bëjnë edhe sot një propagandë antishqiptare të kamufluar, që përhapin gënjeshtra e që nxisin grindje.
    Pa dashje apo me qëllim, artikullshkruesi dhe te tjerë që mendojnë si ai, mbështesin Çubrilloviç-In, duke theksuar në çdo rast ndasinë, të veçantat, mysylman/kristian e në veçanti atë mysylman/katolik. I Kadare vërtet përmend në intervistë rolin e klerit mysylman, por i referohet projektit të Çubrilloviç-It. Ai thotë:
    “Thelbi i kurthit ka qënë armiqësimi shqiptarë-Europë. Në këtë draft, një vend i veçantë i kushtohej rolit që do të luanin imamët dhe hoxhallarët e Kosovës për shpërnguljen e një pjese të kombit shqiptar jashtë Europës. Dhe sidomos për turqizimin e tij” … e kjo nuk lexohet që I Kadare ka thënë:…imamët dhe hoxhallarët e Kosovës luajtën një rol të rëndësishëm në shpernguljen… ; e kjo nuk do të thotë që nuk ka patur edhe nga ata klerikë që kanë propaganduar e nxitur shpërnguljen e shqiptarëve nga tokat e tyre ashtu siç pohohet edhe nga H Omari në shkrim.

    Çdo fakt i jetuar ka spjegime dhe argumentime të ndryshme dhe nganjeherë edhe krejtësisht të kundërta e kjo varet nga këndvështrimi, maturia dhe urtësia e mbi të gjitha nga pavarsia në gjykim. Pragmatikisht, kush është i varur së pari ekonomikisht e më pas varësi të tjera, nuk mund të jetë i pa varur në mendime. E kjo vihet re në sjelljet e përditshme. Në Shqipëri dhe jasht saj ka patur gjithmonë shqiptarë dhe shqipfolës. Dua ta theksoj se jo të gjithë ata që flasin shqip janë shqiptarë. Por të spiegosh, shtrëmbërosh historinë si të të vijë për mbarë vetëm e vetëm për të arritur qëllimin që i vë vehtes, po e quaj vetëm papjekuri. Në krahasimin e drejtë që bën me arbërit e shpërngulur në Itali, autori, nuk le pa i fut edhe dy “kunja”: “që pasi i shfrytëzuan kundër osmanëve” e “nuk duhen përgëzuar për ndonjë tolerancë”.
    Së pari duhet të të kujtoj që po flet për shqiptarë, po çvelrson ndoshta edhe ndonjë nga të parët e tu. Shqiptarët e zgjodhën vetë rrugën e luftës kundër Perandorisë Osmane e as nuk u shtynë ose bënë lojën e venedikasve apo aragonasve (këta të fundit nuk hynë fare në këtë rast); ndërsa për tolerancën (fetare, sepse këtu ke vendosur të qëllosh) dua të të kujtoj se të paktën që nga viti 1100 në Arbëri ishin të vendosura organizmat kishtare të Vatikanit, pra katolike e si rrjedhim nuk qëndron vlerësimi që sjell.
    Së dyti ke sjell për krahasim dy periudha që kanë një distancë kohore prej 400 vjetësh e si rrjedhim kushtet historike janë mjaft të ndryshme e krahasimi nuk qëndron shkencërisht, nëqoftëse i ke vënë vehtes detyrën e sqarimit të problemeve.
    Po ashtu siç nuk i lejon Kadaresë të gjykojë të tjerët duhet të mendosh dy herë kur ti vetë gjykon të tjerët e aq më tepër për kohë që nuk i ke jetuar.
    Jo të gjitha mizat bëjnë mjaltë, jo gjithshka që gjen e lexon është e vërtetë. Në çdo kohë e për gjithshka ka pro e kundër, por zgjuarsia është tek argumentimi pa paramendime. Nuk mund të rrisësh rolin e X vetëm duke ulur ose shvelrsuar rolin e Y.

    E siç duket detyra që i vë vehtes është jo ajo e sqarimit, paqtimit, por e sulmimit e agresivitetit, pa menduar se ku arrin. Kjo lojë, që bëhet në çdo moment, në çdo rast, për të shvlerësuar vlerat shqiptare e të figurave shqiptare është lojë e djallëzuar antishqiptare dhe kjo të bën të ndërsehesh edhe kundër I Kadaresë, pasi ai nënvizon pikërisht këtë moment:
    “Në të vërtetë është pjesë e ligjërimit të pastër kundërevropian. Është tepër e habitëshme, për të mos thënë makabre, që disa vjet pas shpëtimit të Kosovës prej ndërhyrjes atlantike, bëhen përpjekje që mirënjohja t’i kalojë Turqisë! Kjo histori është e vjetër. Gjatë viteve të robërisë osmane, me qindra herë duhet të jetë trajtuar çështja “e mirënjohjes” që shqiptarët duhej të kishin ndaj osmanëve, ngaqë këta të fundit i paskëshin shpëtuar nga Evropa!”
    Nëse ke ose keni marrë përsipër të mbroni klerikët mysylmanë dhe Islamin me çdo kusht, gjeni mënyrat e duhura e jo agresive, pasi pa dashje bëni të kundërtën. Nga ana tjetër duhet të bëni dallimin mes Islamizmit si ideologji e Mysylmanizmit si fe. Feja, besimi është një virtut e çështje thjesht personale. Çdo njeri ka nevojë të besojë në diçka, në dikë, të ketë një udhërrëfyes, një model dhe bën zgjedhjen personale. Por kjo nuk do të thotë që të kthehet në një ideologji zotëruese ose mbizotëruese, pasi athere kalon në ekstremitete të rrezikshme. Dhe në Shqipëri, kjo ka nisur me tentativa për shvlersimin dhe denigrimin e figurave kombtare e vazhdon me justifikimin e pushtimit osman. Të adhurosh pushtuesin për hir të të njëjtit besim fetar, të thuash që ky pushtues nuk na pushtoi por na çliroi, na shpëtoi (nga kush?), është denigruese për komunitetin mysylman dhe atyre mysylmanëve që udhëhoqën dhe luftuan kundër Turkut 100, 200 e edhe 300 vjet më parë u lëvizin kockat në varr. Pjesa e shëndoshë e mysylmanëve shqiptarë, nuk duhet të lejojë kurrë që në Shqipëri të mbizotërojnë zëra të ekstremistëve që nuk hesitojnë të vënë islamismin arabik mbi interesat e kombit shqiptar.

    Së fundi, nëqoftëse keni kohë dhe dëshirë mund të gjeni shkrime mjaft interesante më poshtë:

    LETER MINISTRIT TË JASHTËM TURK Z. AHMET DAVUTOGLLU nga Xhevat REXHAJ
    http://gazetavotra.blogspot.it/2013/05/leter-ministrit-te-jashtem-turk-z-ahmet.html

    KONVENTA JUGOSLLAVO-TURKE PËR SHPËRNGULJEN E SHQIPTARËVE.
    http://gazetavotra.blogspot.it/2013/05/konventa-jugosllave-turke-per.html

    MARVESHJET TURKO-GREKE-JUGOSLLAVE
    PER SHPERNGULJEN E SHQIPETAREVE DREJT TURQIS. nga Sahit REXHEPI
    http://forumi.shqiperia.com/threads/marveshja-turko-jugosllave-e-vitit-1953-p%C3%ABr-shp%C3%ABrnguljen-e-shqiptar%C3%ABve.29761/

    DASHURITË E PAVENITURA ALLA-TURKE. nga Gani QARRI
    http://tribunashqiptare.net/?p=18280

    Si lindi “NAÇERTANIA-NACRT-i”
    PROJEKTI serb i shfarosjes shqiptaretë Ish Perandorinë Osmane?! nga Muhamet NIKA
    http://www.visit-ulcinj.com/blog/2014/01/01/nika-si-lindi-nacertania-nacrt-projekti-serb-shfarosjes-shqiptare-te-ish-perandorine-osmane/

    IDEOLOGJIA DHE HEGJEMONIA SERBOMADHE. nga Nexhat IBRAHIMI
    http://almakos.com/shenja/14915-burimet-e-gjenocidit-serb-ne-ballkan.html

    MARRËVESHJA “XHENTËLLMENE” TURKO-JUGOSLLAVE 1953. nga Veli KRYEZIU
    http://kosovare.forumotion.com/t2825-josip-broz-titos-realizues-i-marreveshjes-xhentelmeneper-s

    [1] Kadare: Kurthi serb, turqizimi ynë dhe armiqësimi me Evropën
    http://www.shqiptarja.com/speciale/2751/kadare-kurthi-serb-turqizimi-yn–dhe-armiq-simi-me-evrop-n-220484.html

    [2] Si e manipulon Kadareja të vërtetën mbi Čubrilović-in
    http://www.e-zani.com/

  • Me duket se nuk e ke lexuar e vëmendje. Une kam vendosur linkun nga është shkëputur fragmenti, ndërsa kam specifikuar se intervista është dhënë për Zeri-n. Pra nuk me rezulton te kem modifikuar asnjë presje. Ti e ke lexuar citimin nga një copëz interviste qe Zeri ka ofruar per lexuesin, duke e shkurtuar, por nuk është ajo origjinalja, te cilën e gjen tek linku i propozuar nga une. Edhe sikur te ishte ashtu, nuk besoj se ndryshon asgjë nga logjika. Pra, mendoj se e ke nisur nga llogorja e jo nga dëshira për te diskutuar e as për te sqaruar. Mund te me akuzosh se jam osmano-fil, por duhet ta vërtetosh, për ndryshe besoj se nuk te vjen keq qe nuk zgjatem ne këtë aspekt.

    Për sa i përket klerikëve mysliman qe drejtuan dy Lidhjet, ky është fakt i pakontestueshëm. Nuk ishin Lidhje ne emër te Islamit, por ne emer te shpëtimit te trojeve shqiptare, qe natyrisht i interesonte Portes deri ne nje fare mase. Per kultur: Ymer Prizreni, udheheqesi i fazes me anti-osmane te Lidhje se Prizrenit, ishte mesues medreseje qe kishte mbaruar studimet per teologji. Nëse ti i konsideron si Lidhje te parëndësishme për memorien tone kombëtare, ky është problem qe unë nuk e diskutoj dot këtu dhe as qe kam kohe e dëshirë. Te lutem mos e sill Nene Terezën si shembull se nuk ka fare lidhje, as tangjente, me veprimtarinë patriotike për te cilën hynë ne histori udhëheqësit e dy Lidhjeve. Nje sherbetor i ekskluzivisht i Zotit, deri ne ate mase sa te ndryshoje emer, familje e vendqendrim, ndryshon nga nje i tille qe kur nevojitet vendos ne plan te pare perkatesi te tjera, si p.sh ajo kombetare.

    Shikoj me keqardhje qe nuk ke kuptuar asgje nga shembulli i Andriçit, as nga përdorimi i fjaleve te Cubriloviçit, as nga paralelizmat, qe nuk barazojne dy kohera, por dy fenomene dhe dy qasje, e as nga historia, sepse aragonezet jo vetëm i shfryteuan shqiptaret, por edhe i nënshtruan me vasalitet. Keto jane pune te “rriturish” i dashur Marin. I leme per nje here tjeter kur te jesh me i qete dhe me i lexuar.

  • Është faji im kur të tjerët nuk më kuptojnë, pasi nuk kam zbërthyer qartë mendimin tim. Po mundohem edhe njëherë.
    Qëllimi i I Kadaresë në intervistën në fjalë, është të theksojë shqetësimin se
    “Rritja e disa grupeve antiperëndimore mes shqiptarëve, të indoktrinuar nga ideologji ekstremiste fetare është një akt mosmirënjohje.” ndaj… etj., dhe qëllimi i këtyre grupeve antiperëndimore përputhet me atë të Çubrilloviç-it
    “Thelbi i kurthit ka qënë armiqësimi shqiptarë-Europë”
    Aspektet e tjera, spjegimi për taktikat e serbëve ilustrojnë, plotësojnë qëllimin famëkeq të Çubrilloviç-it.
    Qëllimi yt , së pari, është përgënjeshtrimi i pohimit të Kadaresë se këto grupe antiperëndimore, me veprimet dhe idetë e demostruara mjaft herë prej tyre, dëmtojnë Shqipërinë. Këtë e bën në mënyrë të kamufluar, duke futur fenë në mes, duke përmendur klerin, që Kadareja e citon si mundësi në planin e Çubrilloviç-it. Ti e shndrron në “duke ndikuar (Kadare-ja) në krijimin e imagjinatës së një kleri mysliman kosovar të prirë drejt bashkëpunimit me shovinizmin serb”. Jam i sigurtë se nuk nisesh të mbrosh ata pjesë të klerit, që edhe ka ndihmuar serbët në procesin e shpërnguljes, por don të evitosh kritikën për Konventën Turco-Jugosllave, si marrëveshje midis mikut dhe armikut të shqiptarëve, e bën për të ruajtur figurën e Turqisë.
    Së dyti, duke përmendur fakte të pakontestueshme (besoj dotë thotë i pakundërshtushme) të prejardhjes nga tradita klerikale të udhëheqësve të Lidhjes së Prizrenit e të Pejës më vonë, tenton të idealizosh klerin myslyman e në këtë mënyrë pa dashje i jep ngjyrë fetare këtyre organizmave që lindën së pari si rezultat i një aktiviteti patriotik që nis jashtë trevave shqiptare dhe i rrethanave politike ndërkombëtare të krijuara në Ballkan e Europë, që finalizohen me traktatin e Shën Stefanit dhe Kongresin e Berlinit, pa nënvlerësuar aspak rolin patriotik të faktorit të brëndshëm e pa vënë në dyshim nivelin intelektual të kërkujt.
    Unë kam kundërshtuar pikërisht idenë, që mundohesh të argumentosh, se shpëtimi i Shqipërisë ishte rrjedhim i veprimtarisë së klerit mysylman, si rrjedhojë e identitetit islam dhe si përfundim i Turqisë si shtet, që e identifikon me fenë islame. Nuk mund të pranoj që Turqia ishte ‘miku’ i shqiptarëve në rastin e Konventës Turko-Jugosllave, pasi kjo konventë i shërben qëllimit serb në dëm të shqiptarëve
    Nga ana tjetër, në mënyrë naive, sjell Lidhjen e Prizrenit (1878) e të Pejës (1899) si argument për justifikimin e Konventës Turko-Jugosllave (1937), duke abuzuar në faktin e patriotizmit të personave të veçantë. Lidhja e Prizrenit lind si rezultat i veprimtarisë së patriotëve shqiptarë brënda e jashtë Shqipërisë, mysylman e kristian dhe nuk mund ta identifikosh me një emër.
    Së fundi fatkeqsia yte dhe e atyre që mendojnë si ti, është pikërisht unifikimi i shtetit me fenë. Kjo sjell si rrjedhojë keqinterpretimin e Historisë e për ta arritur këtë sjell figura si Ymer Prizreni, figurë e padiskutushme patriotike, duke harruar që Ai para se të ishte teolog mysylman, ishte shqiptar, ashtu siç ishin edhe të tjerë mysylman e kristian.
    Nënë Tereza, nuk ka lidhje fare me Lidhjen e Prizrenit e as të Pejës por ka lidhje me predikimet që bën sot ndonjë klerik mysylman, duke ndihmuar në këtë mënyrë përçarjen.(lexo mirë shkrimin tim)
    Nuk të akuzoj si osmanofil, mund të jesh filo i kujt të dëshërosh, nuk është krim, por mos argumento të paargumentushmen. Në kohën që Turqia ishte perandori edhe Austria kishte pushtuar e aneksuar vende në Europë. Në perandorinë Austro-Hungaro bënin pjesë Sllovenia, Hungaria, Herzegovina, Çekia e Sllovakia, Kroacia e pjesërisht edhe Bosnja. Bëj një krahasim të Shqiprisë, që bënte pjesë në Perandorinë Turke, me këto vende. Bëje këtë krahasim në vite.
    Bëj një krahasim edhe në planin e besimit fetar. Sllovenia, Hungaria, Çekia e Sllovakia, Herzegovina pjesërisht, Bosnja pjesërisht ishin dhe janë të besimit ortodoks e nuk u konvertuan në ate katolik të Austrisë.
    Nuk pretendoj të ndryshoj mendimet e tua. Këto rreshta i shkruaj t’i lexojnë ata që të lexojnë e t’i nxjerrin vetë përfundimet.
    I uroj të gjith mysylmanëve përshum vjet Ramazanin.
    Me respekt për lexuesit
    MG

  • Ju kerkoj ndjese per te gjitha budallalleqet qe shkruaj ketu, dhe ju premtoj se nuk do t’ju tregoj nje mungese kaq te madhe respekti sa c’bej me keto shkrime.

    Me respekt për lexuesit
    MG

    • Pse nuk t’u pergjigj njeri, nuk eshte faji yne. Kjo besoj eshte e qarte.
      Mbase nuk e ke nxitur autorin te replikoje, por mbase edhe e ke mberthyer keq me shpatulla pas murit sa nuk pergjigjet dot.
      Personalisht, replika yte e fundit m’u duk teper personale. Ka plot (para)gjykime sespe nisesh nga premisa e qellimeve te “fshehta” te autorit.
      Autori nuk duket se ka tentuar te idealizoje asgje, por thjesht ka propozuar zgjerimin e kendveshtrimit perpara se te gjykohen te tjetet ose te ndertohet hipoteza, si ato te Kadarese. Aq me teper qe Kadare me keto njohuri deshmon serish njeanshmeri dhe mungese informacioni. Intervista eshte propozuar si analiza e shumepritur, iluminuese per shqiptaret, mirepo artikulli i botuar tek ne verteton se burimi i informacionit eshte sforcuar nga Kadareja per te arritur ne perfundime gjysmake. Keto argumenton autori dhe me keqardhje them se nuk e ke kuptuar, jo per kompleksitetin e shkrimit se sa per mungesen e vullnetit per ta kuptuar. Ndoshta sepse shmeben ca mite. Por ky nuk eshte problemi i shkrimit e aq me teper i yni.

    • Mire do e besh. Se komentin nuk ke nga ta kapesh, sillu e sillu perserit po te njejtat gjera, pa shtuar gje. Respekte edhe ti

  • Autorin e shkrimit, H Omari nuk e njoh dhe s’kam si ta kem me të. Më vjen keq për keqkuptimin e shkaktuar për shkak të emrit të tij, pasi për familien Omari kam respekt e veçanërisht për ata dy persona që kam njohur.

    Debati i nisur është kundër mendimeve të H Omarit dhe të debatosh nuk do të thotë të hysh në llogore. Fakti që përmendet llogarja (edhe pse ma atribuoni mua) krijon vijën ndarëse të frontit, në dy anët e së cilës LUFTOHET. Debati nuk është duel, nuk është ndeshje, ku ka fitimtar dhe humbës. Debati aq më tepër kur është publik, i shërben një pjese më të gjërë njerëzish, përfshirë edhe debatuesit, për të nxjerrë konkluzionet vetë, pasi mendojnë dhe “përtypin” ato që thuhen.

    I Kadareja nuk ka nevojë për mbrojtjen time, pasi atë e mbron vepra e vet. Ju rekomandoj të lexoni ose rilexoni ‘Mirëmëngjes republikë’ e “Pashallarët e kuq” e pastaj gjykoni për Kadarenë.

    Sa për mua , sikur të kisha edhe një jetë tjetër, preferoj më mirë të kullos gomarët , se sa të lepij sahanët.

  • Cili eshte kuptimi i mbajtjes se flamujve arab ne duar me shume se flamurin kombetar? Cili eshte kuptimi i te quajturit te arabeve vellezer, e shqiptareve te krishtere jo? Kush je ti z.Autor te komentosh mbi figuren e shkrimtarit me te ngritur shqiptar te te gjitha koherave?

    • Ngadhnjim, nese nuk e di, fotoja e publikuar ne Express eshte kontestuar si foto qe nuk eshte marre nga demonstrimet e Shkupit, por i perket nje konteksti krejt tjeter. Gazeta Express nuk e ka pergenjeshtruar aspak akuzen per fallsifikim fotoje. Eshte dicka e ngjashme me demonstrimet ne Stamboll, ku fotografia e nje maratone u paraqit si marshim proteste. Sa per shqiptarin e shquar te te gjitha koherave……..me mire lere ate muhabet.

      • Pa dashje ke ngatrruar “figurën e shkrimtarit më të ngritur shqiptar” me “shqiptarin më të shquar”.Më tepër kujdes.

        MG

        • Ndjeshmeria jote dhe thirrja per kujdes me prek. Po me thene te drejten edhe shprehja e shqiptarit me te shquar eshte nje spalete qe ia kane vene Kadarese, dhe thjesht………….e ngaterrova. Nejse

          • Te kerkoj ndjese per idiotesine time sa here qe nderhyj, por nuk e di pse ndjej se kam detyren mesianike qe te shpetoj kombin shqiptar dhe figurat e tij me te shquara nga gabimet referenciale qe beni ju ketu. Sigurisht, kjo me jep te drejte te kem pretendimet me te larta per te pasur te drejte sa here qe ketu diskutohet mbi kombin shqiptar. Nderkohe kur jam krejt vetem me veten time, mendoj si ka mundesi qe une bej gjera te ketilla, por pastaj kthehem nga e kaluara heroike e 70 viteve te fundit dhe gjej prehje ne censuren e sivellezerve te mi shqiptare.

  • Mendoja se keni një qëllim fisnik që sado pak t’i shërbeni këtij vendi. Me format tinzare, të trashëguara nga Mesjeta, që përdorni, shihet qartë ç’mjeshtër të fallsifikimit jeni.

    “Ju mund të mashtroni gjithë popullin për një periudhë kohe,

    madje ju mund të mashtroni një pjesë të popullit gjatë gjithë kohës,

    por jo të mashtroni gjithë popullin për gjithë kohën.”

    Abraham Linkoln

    RESPEKTE ADMIN!

  • Your email address will not be published. Required fields are marked *